2. Geburt Dahoam

2. GEBURT DAHOAM

Ois mia gwusst ham, a Kindal wachst in meim Bauch ro,

ham ma uns sehr gfreit, d´Kinder, i und mei Mo.

Mia san dann glei in Urlaub gfahrn, do is oganga mitm speim,

drum wuid i a gor nimmer bis zum Ende bleim.

I ruaf dann a boid bei meiner Hebamme o,

auf de bevorstehende Zeit, gfrei i mi scho.

I moid mi dann o für d´Vorsorge, Nachsorge und d´Geburt dahoam,

sonst brauch i eigentlich Ratschläge von koam.

De 3 Ultraschalle lass i no zua,

und sonst vertrau i einfach auf mi und d´Natur.

Mit Zuckertest, Gewichtsschätzung und sonstige Untersuacherei,

des is oft blos a Goid- und Bledmacherei.

Bei jeder Vorsorge gibt mia d´Marlene a guads Gfui und es is so vertraut,

sie braucht a koan Ultraschall, weil sie mit de Händ an Bauch eine schaut.

A paar kloane Beschwerden und kurze Bedenken hob i ghabt,

dass wega de Venen d´Geburt dahoam ned klappt.

Mit Yoga, Schwimma und Therme hob i mia Zeit für uns zwoa gnomma,

do hob i entspannt und bin vom Alltag a bissal oba kemma.

Ansonsten wars wieda sehr bsonders, a drittes Kindal zu trong unterm Herz,

und de Freid auf d´Geburt dahoam verbunden ohne Schmerz.

Ois oganga is, hob i jede Wehe so gnomma wias kimmt,

und hob a ned gschaut, wiavui Zeit dazwischen verrinnt.

I hob no bis hoibe 3 mit meine Kinder gspuit,

aber auf oamoi gmerkt, dass i mei Ruah dann wuid.

D´Marlene hod mi um 3 no untersuacht, weils no auf a Nachsorge hod miassn,

sie is dann a no gfahrn, aber an Befund wuid i ned wissn.

A Stund später war i dann nur no übern Boi drüber gloant,

´i ruaf jetzt d´Marlene o` hod da Chris dann gmoant.

D´Eva und d´Marlene warn dann do, so schnoi wia da Wind,

dass ma´s ned alloa kriang miassn unser Kind.

I bin dann in d´Bodwanna, da hob i mi glei gfuit richtig woi,

und dann is auf oamoi a ganga ziemlich schnoi.

Mit Glückshaum is as Köpfal kemma,

ausm Wasser wuid i´s dann soiba nehma.

Mitm Chris in da Wanna is dann gleng auf meiner Brust,

und a des moi ham ma s´Geschlecht ned glei gwusst.

In de ersten Stunden is so vui Vertrautheit und Frieden im Raum,

und wos nebenbei de Hebammen ois machan, merkt ma kaum.

I bin so dankbar, weil mei 2. Geburt dahoam war wieder a Traum,

aber wia sois wern hob i mia vorher Gedanken gmacht kaum.

I hob immer versuacht zum bleim im Hier und Jetzt,

weil i hob mit meim Mo und meine Hebammen des beste Netz.

I war so entspannt von Anfang bis zum End,

bis i unser Kindal ghabt hob in meine Händ.

Für mi is a Geburt a wundervolle Reise,

und doch san de Leid leider manchmoi so weise.

Sie song dia wia gfährlich a Geburt dahoam doch is,

ham si aber gor ned drüber informiert, des is gwies.

Es is a ned a jedn sei Sach, aber drei redn kun mia do a wer wui,

Weil für d´Geburt dahoam vertrau i einfach ganz auf mei GFUI.